धनिपुर्जा हराएको देश-भरत थापा बिकल्प ।
" धनिपुर्जा हराएको देश "
आफ्नै देशको बरखी बारेर
मौनधारण गरिरहेजस्ता हिमालहरु
राहदानी भिरेर
उडानको पर्खाइमा रहेका नदीहरु
आत्महत्या गर्न
हामफालीरहेजस्ता झरनाहरु
अनि गुँरास कुम्लो पारेर
बसाइ सर्न लागेका पहाडहरु देखेर
म सोधिरहेछु आमालाइ आमा म गोर्खाली हुँ कि हुँइन ?
सोधिरहेछु
कँहा छ आमा सुस्ता र लिपुलेकको
लालपुर्जा ?
किन हडपिरहेछन दलालहरुले?
कँहा राखेकि छ्यौ आमा बुद्दको जन्मदर्ता ?
किन दाबी गरिरहेछन नाजायज आमाहरु?
अनि कँहा छ सगरमाथाको चिनाटिपन?
कँहा राखेकि छ्यौ अरुणकौ नागरिकता
के साच्चै मेरो देशको धनिपुर्जा हराएकै हो
आमा ?
कि ऐलानी हो आमा मेरो देश ?
सोधिरहेछु आफै काल पर्खिरहेको मधेशले
कसरी मेट्ला कर्णालीको अनिकाल ?
अनि कसरी मेट्ला
भरीया र ढाक्रेहरुको प्यास
आफै लिलाम भएको अरुणले ,
बिन्ती आमा महिनावारी सुकेको छैन भने
टिष्टा र काँगडासंग संसर्ग गरेर
जन्माइदेउन दुइचार अमरसिंहरु
मैले पाथिभरा भाकेको छु
जन्माइदेउन एउटा बुद्द
मैले हलेसी भाकेको छु
अनि जन्माइदेउ भृकुटी र अरनिकोहरु
आमा मैले छिन्ताङ भाकेको छु
छिट्टै पोत्नुछ आमा सेताम्मे हिमालहरुको क्यानभासमा
रक्ताम्मे गुँरासहरूले स्वाभिमानको रङ्ग
देशको रङ्ग । बिजयको रङ्ग । .
आमा , अब चुपचाप , शान्त बग्नेछैन कोशी
टोलाएर उभिरहनेछैन कन्चनजघाँ
बरु रातै हुनेछ सगरमाथा
रातै बग्नेछ दुधकोशी
लडाकु हुनेछन बुद्ध
तर आत्मसमर्पण गर्नेछैन देश
बरु सहिद हुनेछ ब्रह्माण्डको ।
मलाइ यत्ति भनिदेउ आमा
कँहा छ बलभद्रहरुले राख्न दिएको
यो देशको धनिपुर्जा
वीर पुर्खाहरुले दर्ता गराएको
गोर्खाली इतिहास
छिट्टै नविकरण गर्नुछ आमा
भन्देउन कँहा छ मेरो देशको धनिपुर्जा
कँहा छ आमा ? कँहा छ ?
- भरत थापा बिकल्प डाडाँगाँउ धनकुटा ( सम्पर्क - 9815317680 )
Comments
Post a Comment